Description

Tá An Druma Mór ar cheann de  na húrscéalta is fearr de chuid an 20ú haois. Is é is ábhar dó achrann a tharla faoi bhanna ceoil – an Druma Mór – i mbaile cladaigh i Rosa Thír Chonaill, go luath sa chéad seo caite. Ba le pobal daoine, i gcomhar a chéile, na gléasraí  ceoil, agus roghnaítí na seinnteoirí ar a gcumas gach Féile Pádraig le clú an bhaile a sheasamh sa mhórshiúl bliantúil. Thug eagraíocht pholaitiúil iarracht seilbh a fháil ar an mbanna, mar chomhartha ar a gceannasaíocht féin, agus spreagadh fear uaillmhianach, a fáisceadh as cruatan an tsaoil, leis na Sons of St Patrick a bhunú chun an Druma Mór a chosaint orthu. Léiríonn an t-údar an choimhlint idir filiúntacht agus saoltacht an duine as cúrsaí cointinneacha an bhanna, agus éiríonn leis siombail an dúchais a dhéanamh den Druma Mór.