An Líon a Bhailíonn Gach Iasc – Saol, Saothar agus Oidhreacht Michael Hartnett

Fiche bliain i ndiaidh do Michael Hartnett an saol seo a fhágaint, deineadh comóradh air ag comhdháil dar teideal ‘An Líon a Bhailíonn Gach Iasc – Saol, Saothar agus Oidhreacht Michael Hartnett’, a reáchtáladh i gColáiste Mhuire gan Smál, Luimneach. Tharraing an teideal ar fhocail Hartnett sa dán ‘Teanga Mise’ in Adharca Broic (1978), ag fógairt go raibh fáilte á cur roimh ábhar ilghnéitheach agus roimh phlé critice ilchineálach.

Tá léargais úrnua anseo ó scoláirí agus saineolaithe ar ghnéithe de shaol agus de shaothar Hartnett. Tá cuntais spreagúla le fáil ann óna chomhfhilí, agus rannóg speisialta le dánta comhaimseartha.